Елена Пак «Ассамблея жастары» республикалық қоғамдық бірлестігі облыстық филиалының төрағасы. Жыл басында Қызылорда қаласында өткен бесінші Ұлттық құрылтайда Мемлекет басшысының қолынан «Шапағат» медалін алды.

Елена Шиелі ауданы Ақмая ауылында дүниеге келген. Атасы Виталий Пак күрішші болса, әжесі Светлана Лян есепші қызметін атқарды. Әкесі Владимир мен анасы Татьяна кәсіппен айналысады. Үлгілі отбасы ауылға да сыйлы. Бала күнінен зерек әрі қағылез Елена ауылдағы №49 орта мектепті бітіріп, Қорқыт ата атындағы Қызылорда университетінен қазақ тілі мен әдебиеті пәнінің мұғалімі мамандығын алды.

–Тарихқа көз жүгіртсек 1937 жылы Қиыр Шығыстан Қазақстанға 98000 корей депортацияланған екен. Оның 50 мыңы Қызылорда облысына қоныстанған. Қазір бұл өңірде сол кезде келгендердің төртінші ұрпағы өмір сүріп жатыр. Менің ата-бабам Шиеліні мекен еткен. Біздің осы күнге аман-есен жеткенімізге қазақтың дархан пейілі дәнекер. Ішерге ас, киерге киім қат уақытта қазақтар бір үзім нанын теңдей бөліп, бауырына басты. Бір шаңырақ астында бір үйдің баласындай тату-тәтті өмір сүрді. Туған жерінен жырақтап қалған ұлтты жатсынбай қамқорлық көрсету кеңпейілділік деп білемін. Атам Виталий Пак ауылда механизатор, күрішші болған, қарапайым шаруа адамы. Ал, әкем болса, ауыл ветеринары, мал шаруашылығын дамытуға зор үлесін қосты. Айтпақшы, әжем Светлана Лянь ауылдық кеңесте бас есепші қызметін атқарды. Осылайша менің отбасым жергілікті тұрғындармен араласып-құраласып, екінші отанына тез сіңісіп кеткен, – дейді ол.

Бүгінде Елена қоғамдық жұмыстарға белсене қатысады. Сондай-ақ мемлекеттік тілді насихаттауда елеулі еңбек етіп келеді. «Абай қазынасына саяхат» және «Мәміле» клубтарының жетекшісі. Қазақ көркем әдебиетін ерекше жақсы көреді. Мұхтар Әуезовтің «Абай жолы» романын, Абай Құнанбайұлының «Ескендір» поэмасын қызыға оқып, мазмұнын жатқа біледі. Абайдың 200-ге жуық өлеңін, Мұқағали Мақатаев пен Тұманбай Молдағалиевтің де туындыларын сүйіп оқиды. Жалындаған жастың еңбекқорлығы өзгелерге үлгі.

2021 жылы Мемлекет басшысының тапсырмасы бойынша «Ассамблея жастары» республикалық қоғамдық бірлестігі құрылды. Бұл ұйымның басты мақсат-міндеті – жастар бастамаларын дамыту, қоғамдық келісім мен бірлікті нығайту, жастардың әлеуметтік деңгейін арттыру. Облыстағы бірлестікке Елена жетекшілік етті. Үш жыл мерзімде ұйым облыстық деңгейде 80-ге жуық шара, 5 ірі жобаны іске асырды. «Social assembly», «Бірлік тілі», «Ел мұрасы», «Таза орта», «Қасиетті парыз», «Жастар медиа» атты 6 бағытта өз жұмысын жандандырып, рөлін күшейтті. Сыр өңірінде этнос жастары арасында мәдениетті байыту, патриоттық бағытта көптеген шаралар мен жобаларды іске асыруына себепші болды.

– Қазақ тілін кішкентай кезімнен үйрендім. Көршіміздің бәрі қазақ болғандықтан, бір-біріміздің үйімізге барып араласып, бір үйдің баласындай өстік. Есімде, бірінші сыныпты аяқтаған соң әліппемен қоштасу кешін жүргіздім. Кішкентай корей қызының қазақша сайрағаны көпшілікті қызықтырды. Менің қазақ тіліне деген сүйіспеншілігім одан сайын арта түсті. Жоғары сыныпқа өткенде тілді тереңірек меңгеріп, толық игердім. Сыныптастарым маған әрдайым достық пейіл танытып, қолдау білдірді. Осылайша білімге және қазақ тіліне деген қызығушылығым мені ұлттың бай тарихына жетеледі. Қазақтың салт-дәстүрі, әдеп-ғұрпы, мәдениеті мен өнерін бойыма сіңіріп өстім. Отбасында Наурыз мерекесін ерекше тойлаймыз. Ұлттық дәм дайындап, жақын-туыспен, көрші-қолаңмен мерекені атап өтеміз. Бір-бірімізге сый-құрмет көрсетіп, қонаққа шақырамыз, – дейді ол.

Былтыр облыста Қазақстан халқы Ассамблеясының 30 жылдығын мерекелеу аясында еліміздің барлық өңірінен келген 100-ден астам жасты біріктіретін республикалық форум өтті. Форумның негізгі мақсаты –жұмысшы мамандықтарының мәртебесін көтеру, техникалық білім беруді дамыту, қазіргі заманғы білім беру жүйесіне жаңашылдық енгізу. Онда «Таза Қазақстан» экологиялық бағдарламасы аясында тал егу акциясы өтті. Бұл жастар тарапынан табиғатты қорғауға бағытталған маңызды қадам болды. Форум жастарға жаңа мүмкіндіктер ашып, елдің болашақ дамуына үлкен әсер етті. Осы шарада Елена белсенділік танытып, жастардың ұйытқысы бола білді. Өзіне жүктелген жауапкершілікті тиянақты атқарып келеді.

– Біз бүгінде егемен елімізде бейбіт өмір сүріп жатырмыз. Бұрын да әртүрлі этнос өкілдері өзара түсіністікте, бірлікте өмір сүрген. Сондықтан өзің тұрған елдің тілін білу – әр азаматтың парызы. Бұл – адамдар арасындағы байланыстың басты кепілі. Қазақ тілін үйренемін деген жастарға Абай Құнанбайұлының өлеңдері мен қара сөздерін оқуға кеңес беремін. Абайдың шығармалары – ұлттық тәрбиенің, рухани дамудың негізі. Жастарды адамгершілік қасиеттер негізінде тәрбиелеудің маңыздылығы да осы тұста арта түседі. Менің арманым өте көп. Қазақ тілін насихаттау жұмыстарын одан әрі дамытып, жас ұрпаққа ұлттық құндылықтарды жеткізу жолында еңбек етемін. Этнос жастары арасында мәдениетті байытуға, патриоттық жобаларды іске асыруға атсалысуды жалғастыра беремін, – дейді Елена Пак.

Қазақ жері қаншама этнос өкілдері тату-тәтті өмір сүріп келе жатқан қасиетті қоныс. Олардың ынтымағы өзгелерге үлгі. Кейінгі уақытта қазақша сөйлейтін өзге ұлт өкілдері айтарлықтай көбейген. Оның ішінде жастардың үлесі жоғары. Солардың бірі Елена. Ол қазақ тілін жетік біліп ғана қоймай, өзгелерге үйретіп, мемлекеттік тілге деген құрметін көрсетіп келеді. Сондай-ақ ол еліміздің дамуы мен өркендеуіне өз үлесімді қосу азаматтық парызым деп санайды.

Сара АДАЙБАЕВА

Бүгін аудан әкімі Айтбай Жандарбеков аудан әкімдігінің мәжіліс залында 1 мамыр – Қазақстан халқының бірлігі күні мерекесіне орай мерейлі жасқа толған ел ағалары мен ардақты аналарға құрмет көрсетті. Ауданымыздың өсіп-өркендеуіне өлшеусіз үлес қосқан бірқатар азаматтарға ауданның ең жоғары марапаты – Шиелі ауданының «Құрмет» грамотасы табысталды.

Атап айтқанда, денсаулық сақтау саласының ардагері, 85 жасқа толған Кентай Мадиевке, білім саласының ардагерлері – 85 жастағы Күлпаш Нұрмағамбетова мен 80 жасқа толған Ералы Ағыбайұлына, сондай-ақ 75 жастағы Ұлтай Әуелбекқызы мен мәдениет саласының ардагері, 70 жасқа толған Қанатова Бағлан Ұзаққызына ауданның жоғары марапаты табысталып, құрмет көрсетілді.

Кентай Мадиев – саналы ғұмырын денсаулық сақтау саласына арнаған білікті маман. Ол ұзақ жылдар бойы халық денсаулығын сақтауға үлес қосып, өз ісіне адалдығы мен кәсібилігінің арқасында ел құрметіне бөленген ардагер.

Күлпаш Нұрмағамбетова – білім беру саласында еселі еңбек еткен ұстаз. Ұзақ жылдар бойы шәкірт тәрбиелеп, олардың білімді де білікті азамат болып қалыптасуына сүбелі үлес қосқан ұлағатты жан.

Ералы Ағыбайұлы – өмірін білім саласына арнаған тәжірибелі педагог. Ұрпақ тәрбиесінде өзіндік қолтаңбасын қалдырып, шәкірттерінің жүрегінен орын алған қадірлі ұстаздардың бірі.

Ұлтай Әуелбекқызы – білім саласының ардагері, талай жылдар бойы жас ұрпаққа сапалы білім мен саналы тәрбие беріп, ел болашағын қалыптастыруға зор үлес қосқан ұстаз.

Бағлан Ұзаққызы – мәдениет саласының ардагері. Ол ауданның рухани өмірінің дамуына белсене араласып, ұлттық құндылықтарды насихаттауға, мәдениет пен өнердің өркендеуіне елеулі еңбек сіңірген жан.

Алқалы жиын барысында аудан әкімі мерейтой иелерін шын жүректен құттықтап, олардың ел дамуына қосқан елеулі еңбектері мен өнегелі өмір жолдары кейінгі ұрпаққа үлгі екенін атап өтті. Сондай-ақ, мерейтой иелеріне дәстүрге сай құрмет көрсетіліп, ізгі тілектер айтылды.

Шиелі ауданы әкімінің баспасөз қызметі

Бүгін «Руханият» орталығында қазақ поэзиясының сыршыл өкілі, лирик ақын Қатира Сыздыққызы Жәленованың 75 жас мерейтойына арналған «Әдебиет пен сезімнің тоғысуы» атты тағылымды кездесу кеші өтті.

Шараның ашылуында аудан әкімінің орынбасары Болатбек Ысмағұлов сөз сөйлеп, аудан әкімі атынан мерейтой иесіне ізгі лебізін жеткізіп, арнайы құттықтау хатын табыстады.

Аудан әкімінің орынбасары өз сөзінде Қатира Жәленованың қазақ әдебиетіне қосқан сүбелі үлесін, оның шығармаларындағы терең лиризм мен адам жанының нәзік иірімдерін ерекше атап өтті.

Айта кетейік, Қатира Жәленова 1951 жылы 22 сәуірде Қызылорда облысы, Шиелі ауданы, Ақмая ауылында дүниеге келген. ҚазМУ-дің филология факультетін бітірген. 1973 - 1993 жылдары Қазақ радиосында редактор болып істеген.

Ол – «Кел, махаббат», «Аңсаған менің әнімсің», «Ақ гүлдер» атты өлең жинақтарының авторы. Тәжік ақыны Г.Сүлейменованың «Қырық бұрым» (1983) өлеңдер жинағын аударған.

1979 жылы Мәскеуде өткен Бүкілодақтық жас ақын-жазушылардың кеңесіне, Түрік дүниесі поэзиясы ІІ фестиваліне қатысқан. Республикалық «Жігер» фестивалінің лауреаты, Абайдың 150 жылдығына арналған ақындар мүшәйрасының жүлдегері. Облыс әкімінің екі мәрте стипендианты.

Кеш сұхбат форматында өрбіді. Кездесу барысында елінің еркесі, халықаралық «Алаш» әдеби сыйлығының иегері, Шиелі ауданының «Құрметті азаматы» Қатира Сыздыққызының өмір жолы мен шығармашылығы кеңінен әңгімеленді. Ақынның жүрек тербетер жырлары оқылып, көрермен қауымға ерекше әсер сыйлады.

Сонымен қатар, аудан өнерпаздары ақын сөзіне жазылған әндерді орындап, әдеби-сазды кештің мазмұнын тереңдете түсті. Тағылымды басқосу рухани әсерге толы болып, қатысушыларға ұмытылмас әсер қалдырды.