Түркияда 4,7 магнитудасымен жер сілкінді

Түркияның Кахраманмараш провинциясында қуаты 4,7 магнитудасымен жер сілкінісі тіркелді. Бұл туралы Түркия үкіметі жанындағы Төтенше жағдайлардың алдын алу және салдарын жою басқармасынан (AFAD) мәлім етті, деп хабарлайды ҚазАқпарат Анадолы агенттігіне сілтеме жасап.

Жерасты дүмпуі жергілікті уақытпен 09:47-де Гёксун ауданында тіркелді. Зілзала ошағы 7 шақырым тереңдікте орналасты.

Қаза тапқандар мен қираған ғимараттар туралы ақпарат түскен жоқ.

Еске салайық, 6 ақпанда Түркияның Кахраманмараш провинциясында қуаты 7 балдан асатын екі жер сілкінісі болды. Тербеліс елдің 10 провинциясында, сондай-ақ көршілес мемлекеттерде, соның ішінде Сирияда сезілді.

Мамандар аймақта жерасты дүмпулері әлі де жарты жыл бойы жалғасады деген болжам жасады. Түркияда жойқын зілзала болатынын болжаған Нидерланд зерттеушісі Франк Хугербитс наурыз айының басында жаңа апаттар күтілетінін ескертті.

7 наурызда Түркияның Хатай, Кахраманмараш және Кайсери провинцияларында үш жер сілкінісі болды.

Ақпан айында болған табиғи апаттан Түркияға келген шығын 100 млрд доллардан асуы ықтимал.

Түрік полициясы қираған ғимараттар ісі бойынша күдікті ретінде 269 адамды ұстады.

Соңғы ресми деректерге сәйкес, табиғи апат 48 мыңға жуық адамның өмірін қиды.

Сурет ашық дереккөзден алынды.