Бүгін Қызылордада 16 жастағы қызды сыныптастары сексуалды құлдықта ұстаған оқиғаға қатысты 9 адамға сот үкімі шықты.

Қызылорда облысы кәмелетке толмағандардың істері жөніндегі мамандандырылған ауданаралық сотында адамдар тобына, оның ішінде кәмелетке толмағандарға қатысты ҚР ҚК 194-бабы (ірі мөлшерде пайда табу мақсатында қорқытып алушылық), 110-бабы (көрінеу кәмелетке толмаған адамға қатысты азаптау), 134-бабы (кәмелетке толмағанды жезөкшелікпен айналысуға тарту) бойынша қылмыстық іс қаралды. 

ҚР ҚПК-нің 29-бабының талаптарына сәйкес бұл іс жабық сот отырысында қаралды.

Жабық сот отырысынан кейін сот судьясы Сәбит Рүстемов БАҚ өкілдеріне сот үкімін таныстырды. 

— Сотталушылардың кінәсі оқиға орнын, заттар мен құжаттарды қарау хаттамаларымен, бейнежазбалармен, WhatsApp арқылы хат-хабарлармен, карточкалық шоттардың банктік үзінділерімен, сараптама нәтижелерімен, сондай-ақ жәбірленушінің жауабымен дәлелденген, — деді судья.

Оның айтуынша, прокурор сотталушылар М.Н., А.Ж., Қ.Д.-ны кінәлі деп тауып, оларды 6 (алты) жыл 8 (сегіз) ай мерзімге бас бостандығынан айыруды,Б.А.-ны 4 (төрт) жыл 6 (алты) ай мерзімге бас бостандығынан айыруды; Т.Ұ., Қ.А.-ны 4 (төрт) жыл мерзімге бас бостандығынан айыруды, Т.А., Б.А. и Т.Д.-ны 8 (сегіз) жыл мерзімге бас бостандығынан айыруды сұрады.

— Сот жаза тағайындау кезінде сотталушылардың жазасын жеңілдететін мән-жайлар ретінде М.Н., А.Ж., Қ.Д., Б.А.-ның кәмелет жасына толмағандарын, сонымен бірге сотталушылар Т.Ұ. және Қ.А.-ның жасаған істеріне шын жүректен өкінетінін көрді. Айыптау актісіне сәйкес сотпен ауырлататын мән-жайлар анықтаған жоқ. ҚК-нің 55-бабына сәйкес, жеңілдететін мән-жайлар бар және ауырлататын мән-жайлар болмаған кезде, жаза мерзімі ҚК-нің бабында көзделген ең жоғары мерзімнің 2/3-нен аспауы тиіс. Сот үкімімен кәмелетке толмағандар М.Н., А.Ж., Қ.Д. ҚК-нің 134-бабы 3-бөлігі, 1), 2)-тармақтары, ҚК-нің 194-бабы 3-тармағы 2)-тармақшасы, ҚК-нің 110-бабы 2-тармағы 1)-тармақшасы бойынша кінәлі деп танылып, қылмыстық құқық бұзушылықтар жиынтығы бойынша оларға 6 жыл 8 ай бас бостандығынан айыру түріндегі жазалар тағайындалды. Сотталушы Б.А. ҚК-нің 194-бабы 2-бөлігін 2)-тармақшасы бойынша кінәлі деп танылып, оған 4 жыл 8 ай бас бостандығынан айыру жазасы тағайындалды. Сотталушылар Т.Ұ. және Қ.А. ҚК-нің 28-бабының 5-бөлігі, 194-бабы, 2-бөлігі 1), 2)-тармақшасы бойынша кінәлі деп танылып, оларға 4 жыл 8 ай бас бостандығынан айыру жазасы тағайындалды. Сотталушылар Т.А., Б.А. және Т.Д. ҚК-нің 134-бабы 3-бөлігі 1)-тармағы және ҚК-нің 194-бабы 2-бөлігі 2-тармағы бойынша кінәлі деп танылып, қылмыстық құқық бұзушылықтардың жиынтығы бойынша олардың әрқайсысына 7 жыл 6 ай бас бостандығынан айыру түріндегі жаза тағайындалды, — деді судья Сәбит Рүстемов.

Үкім заңды күшіне енген жоқ.

Cурет: Syrboyi.kz