5 жылда бірде-бір қылмыс тіркелмеген: учаскелік полиция инспекторының ауылдағы жұмысы

Қасиетті Сыр елінің қызметі мен антына адал тәртіп сақшысы ерекше құрметке ие. Бұлай деуге себеп Қызылорда облыстық полиция департаментінің Арал ауданы полиция бөлімінің учаскелік полиция инспекторы полиция майоры Ғалымжан Ізмағанбетов қызмет атқаратын Қаратерең және Жаңақұрылыс ауылында 5 жылдан бері бірде бір қылмыс тіркелмеген. Бұған азаматтардың тату-тәтті қатынаста болуы және учаскелік полиция  инспекторының қолға алған профилактикалық шаралары негіз деуге болады.

Өзгелерге үлгі көрсеткен бұл екі ауылда  3470 адам тұрады. 9 шаруа қожалығы бар. Ауыл балалары тағылымы мол 2 білім ошағында оқиды.

Ауыл тұрғындарының көбі мал ұстайды. Учаскелік инспектор Ғалымжанның айтуынша, бұл ауылда  қоғамдық тәртіп тұрақты. Күн сайын жүргізілетін профилактикалық жұмыстар өзінің оң нәтижесін беріп келеді.

Мемлекет басшысының тапсырмасы  бойынша құқық бұзушылықтың алдын алу саласындағы негізгі буын учаскелік полиция инспекторларына берілген. Бұл ретте ішкі істер органдарының «отымен кіріп, күлімен шығып» жүрген учаскелік полицейі Ғалымжанның жұмысы қауырт.  

Тұрғындардың қайнаған тіршілігінің ортасында жүрген тәртіп сақшысы халыққа жақын болудың маңызын түсініп, әрбір тұрғынға көмек қолын созуға тырысады. Учаскелік инспектор болғандықтан, ол бірінші кезекте ауыл тұрғындарымен және ақсақалдармен, жергілікті мектеп оқушыларымен, олардың ата-аналарымен өзара байланыс орнатқан.

Ғалымжан Жомартұлының жұртшылық алдында жауапкершілігі мол жұмысын бастағанына алты жыл болды. 2012 жылдан бастап ол ішкі істер саласында  абыройлы қызмет етіп келеді.

Бүгінде учаскелік полиция инспекторы өзіне берілген аумақтағы қандай да болсын құқық бұзушылыққа жол бермеу, оның алдын алу, қылмыстың бетін ашу, түскен арыз-шағымдармен жұмыс жасау сияқты көптеген міндеттерді абыроймен атқарып келеді. Мамандығын жақсы көретін, кәсібіне адал инспектор қиындығы мен жуапкершілігі мол қызметінен еш жалыққан емес. Керісінше, ауыл тұрғындарының оған деген сенімі мен ризашылығына бөленген сайын, Ғалымжанның өз мамандығына деген қызығушылығы мен сүйіспеншілігі арта түседі. 

Осы саладағы  қызметі әділ  бағаланып, Қызылорда облыстық Полиция департаментінің Алғыс хаттарымен марапатталған. Ғалымжан адал жары Гүлнұр екеуі екі ұл бір қыз тәрбиелеп отырған үлгілі отбасы.

Сурет Қызылорда полиция департаментінен