Қызылордалық полицейлер Мемлекеттік рәміздер күнін атап өтті

4 маусым – Қазақстан Республикасының Мемлекеттік рәміздер күні. Қазақстандықтар бұл күнді айтулы мереке ретінде атап өтіп келеді.

 Мемлекеттік Рәміздер – Ту, Елтаңба және Әнұран еліміздің дербестігі мен тәуелсіздігін бүкіл әлемге танытушы әрі мемлекетіміздің өткені мен бүгіні және болашағы арасындағы сабақтастықтықтың жарқын көрінісі.

Сондай-ақ, рәміздер – халқымыздың рухын, қаhармандығы мен даналығын, асқан арман-тілегін жеткізетін құнды белгілер.

Айтулы күнге орай, Қызылорда облысы ПД-нің жеке құрамы салтанатты түрде сапқа тұрып, Қазақстан Республикасының Мемлекеттік Әнұранын шырқады.

Іс-шара барысында департамент бастығының орынбасары полиция подполковнигі Оралбек Омаров жеке құрамды құттықтап, «тәуелсіздігіміздің тұмарына айналған мемлекеттік рәміздеріміз болашаққа бет түзеген ұлы көшімізді демеп, игі істерімізді қолдай бергей, әрдайым еліміз тыныш, халқымыз аман, туымыздың мәртебесі биік болсын» деген лебізін жеткізді.

–    Бұл мереке барлығымызды біріктіре түседі, ұлттық сананы қалыптастырады, патриоттық сезімді оятады, азат елдің бірден-бір нышаны саналатын рәміздерімізді құрметтеп, қастерлей білу-бүгінгі, ертеңгі ұрпақтың парызы, – деп атап өтті Оралбек Тәубақабылұлы.

Сурет полиция департаментінен