Қызылордада пробация есебіндегі 19 сотталған түзеу мекемесіне жіберілді

Қызылорда облысы бойынша қылмыстық-атқару жүйесі департаментінің аудандық және қалалық пробация қызметінің есебінде бүгінде 1000-ға жуық сотталған азамат тіркеуде тұр. Пробация бақылауында бола тұра, кейбір азаматтар сот жүктеген міндеттерді орындамай, жаза өтеу тәртібін бұзуда. Биыл алғашқы үш айда осындай құқық бұзушылықтарға жол берген 19 сотталғанға қатысты сот шешімі шығып, олар жазаның өтелмеген бөлігін түзеу мекемесінде өтеуге жіберілді. 

Пробация қызметінің инспекторлары сотталғандардың құқықтық тәртіпті сақтауын қадағалау үшін күнделікті профилактикалық іс-шаралар жүргізеді. Әрбір сотталған азаматтың тұрғылықты мекенжайы тексеріліп, олардың кешкі уақытта қоғамдық орындарға бармауы қадағаланады. Жаза өтеу тәртібін бұзуға бейім тұлғаларға жеке түсіндірме әңгімелер өткізіліп, құқықтық кеңестер беріледі. Сонымен қатар пробация инспекторлары жергілікті атқарушы органдармен және құқық қорғау құрылымдарымен тығыз байланыста жұмыс істеп, сотталған азаматтарды қайта әлеуметтендіру, олардың құқық бұзушылыққа қайта бармауы үшін кешенді шаралар қабылдауда. 

– Пробация есебінде тұрған азаматтар сот белгілеген шектеулерді орындауға міндетті. Егер олар бұл талаптарды елемейтін болса, заң аясында қатаң шаралар қолданылатыны ескертіледі. Жаза өтеу тәртібін бұзу олардың бас бостандығынан айыру жазасына қайта тартылуына әкелуі мүмкін. Сондықтан олар берілген мүмкіндікке жауапкершілікпен қарап, қайта құқық бұзбауы қажет, – дейді пробация қызметтеріне басшылық жасау тобының бас маманы Ғаламат Құлманов.